ചില വിവർത്തനങ്ങൾ

 

 ചിലതുണ്ട് വിവര്ത്തനം ചെയ്യാൻ എത്ര ശ്രമിച്ചാലും സാധിക്കാത്തവ,
മരിച്ചിട്ടും ചില ഉടലനക്കങ്ങൾ നിനക്കുണ്ടെന്നു പറഞ്ഞപ്പോൾ
ആരും വിശ്വസിച്ചില്ല
നീയും ഞാനും മാത്രം അറിയുന്ന ചില ചലനങ്ങൾ,
ചില മൂളലുകൾ ,
അർത്ഥം വെച്ചും വെയ്ക്കാതെയും ഉള്ള
നിന്റെ നീണ്ട മൌനങ്ങൾ,
പരിചിതമായ ചില നിശ്വാസങ്ങൾ,
ആളിക്കത്തലുകൾ ,
അണച്ചിലുകൾ
എനിക്ക് മാത്രം കാണാൻ കഴിയുന്നവ.
നീ ചിരിക്കുന്നെന്നു ഞാൻ പറഞ്ഞപ്പോളും
ആര്ക്കും മനസ്സിലായില്ല.
എന്നത്തെയും പോലെ നീ ചിരിക്കുന്നുണ്ടെന്നു എനിക്കറിയാം
ആര്ക്കും മനസിലാകാത്ത ഗഹനമായ ആ ചിരി
വിവര്ത്തനം ചെയ്യനാകാതെ പകച്ച് ഞാനും